وداعا أيها الدكتور.... بقلم أشرف قدوار

مخمد الباجي قايد السبسي رئيسا لتونس .. برشا كلام و برشا حديث و برشا فريش .. عندك وقت تفضل .. ما عندكش تعدى و أعمل روحك ما ريت شيئ أو برا هنئ البجابيج يكون أحسن .. لابد أن نرتاح قليلا لنعيد ترتيب البيت ..لن أتعب نفسي مع الأوباش ولن أكلف نفسي مشقة الرد عليهم.. ففى المواقف الصعبة تظهر معادن الرجال لابد من الاعتراف بالهزيمه للأسف الشعوب العربيه تستعذب العبوديه تحبها بل تعشقها..... أهم حاجة و أهم أسئلة نجمو نجبدوها و نحكيو عليها توا .. لماذا هزمنا ؟ و كيف فاز السبسي ؟ و من انتخبه ؟ لما تدخل في انتخابات و حملة انتخابية و انتي ضدك الوطنية 1 و 2 و نسمة و التونسية و تونسنا و جريدة التونسية و الشروق و المغرب و الصباح و السور و لا براس و و ضدك اذاعة موزاييك أفلام و شمس و جوهرة و م افم..والائحة تطول ... راك صعيب ياسر كان تنجم تفوز و ولم بمقعد في البرلمان مش كرسي رئاسة.. ثمانين في المائة من التوانسة اتبع في وسائل الاعلام هاذي .. الذي خدمتهم قائمة على مبدأ واحد ..تنميق صورة الباجي قايد قايد السبسي و كل ما يتبعلو و القدح في شخص الدكتور المرزوقي..... كيفاه تحب تربح و هاذوما الكل ضدك .. منضومة كاملة يتحكم فيها الكبارات و جماعتهم .. الباجي انتخبه عشاق العبودية.. عباد ماتنجمش تعيش من غير سيد.. من غير واحد يكون سيدهم و عليه وهرة رئيس كيما يحكيو. .يقول سيد قطب رحمه الله " العبيد هم الذين يهربون من الحرية فإذا طردهم سيد بحثوا عن سيد اَخر, لأن في نفوسهم حاجة ملحة إلى العبودية لأن لهم حاسة سادسة أو سابعة.. حاسة الذل.. لابد لهم من إروائها, فإذا لم يستعبدهم أحد أحست نفوسهم الظمأ إلى الاستعباد وتراموا على الأعتاب يتمسحون بها ولاينتظرون حتى الإشارة من إصبع السيد ليخروا له ساجدين" هاذي هي حقيقتكم ايها البجابيج... نحن عبيد مواقفنا و مبادئنا .. لا تهمنا الأشخاص في شيئ ... ندافع عن الحرية أينما وجدنا سبلها.. بينما انتم عبيد الأشخاص.. تلحسو للبجبوج و لبن علي و لبورقيبة في قبرو و لكمال مصطفى النابلي و خميس قسيلة و للغنوشي و لمهدي جمعة و للبوليس الذي واقف في الكياس و للأستاذ الذي يقري فيك و للجميع...التلحيس عقلية تتولد بيها ..و تعيش معاك ... و عندك ديما قدامك مثال حي.. فالذي انتخب اليوم البجبوج هو نفسو الذي كان المعلم قبل كي يخرج باش يجيب الطباشير يوصيه باش يكتب أسماء التلاميذ الى تشوش و هو نفسو كيف كبر شوية ولاا يلحس للقيم العام و المدير و السكرتيرة و ادارة الليسي الكل باش ياخو بيي وكي يتسرق الروجيستر يمشي يقود بصاحبو الذي هزو للادارة و كي زاد كبر و دخل الجامعة دورها يتبع في الأساتذة في البيفات و يحب يركش معاهم و كي أستاذ يسمعو كلمة عيب و كان لازم يبخسو كان يسكت... و يقعد يستنى أستاذو قدام الأمفي بالنصف ساعة باش يجيه الأستاذ يقريه و كان ماجاش يمشي يلوج عليه و يقلو بالله ايجا قرينا ؟؟ و بعد ياكل صفر و يسكر فمو ... الأشكال هذي نفسها هي الذي انتخبت البجبوج و قالك يعجبها خاطر يحسوه رجل المرحلة باقتدار بفففف .. مافيكمش دواء و الله.. فوالله لو أمطرت السماء حرية لهربتم منها تحت الاسقف و الجحور الباجي سب الجنوب..سب سيدي بوزيد... قال الشهداء في تونس ثلاثة فقط و الباقي (...) .. غلط في الحديث عشرين مرة على المباشر.. اعتدى على الصحفيين .. رفض المناضرة.. رجالاته و أبناء حزبه بن تيشة و صحابو قالو أنو صحيا السبسي ماينجمش يخدم أكثر من أربعة ساعات في منصب يستحق 17 ساعة خدمة يوميا.. أفلا يكفي هذا؟؟؟؟؟ البقية باعو الطرح.. حمة الحمامي ولد الشعب الذي طلع في اخر حلقة مش هو ولد الشعب... متاع البروليتاريا و قفة الزوالي و كيلو الفلفل.. الذي قالك لا لعودة رموز النضام البائد.. توا قلب الفيستا.. وأحمد الصديق لعب بشلاغمو و قال ما عندناش مشكل مع نداء تونس لأنو يضم في صفوفو عديد اليسايرين وهو الحزب الأقرب للجبهة في المبادئ... أحمد نجيب الشابي مازال مصدوم بنتائج الرئاسية .. ما فهم شيئ.. 0.8 في المائة هي سنين سجنو و اضرابو عن الطعام و سنين التعذيب ؟؟ مصطفى بن جعفر.. قضيت على روحك بالانبطاح للنهضة.. و انتحرت سياسيا .. ما وصلتش حتى صفر فاصل.. المرة هاذي صفر مدور محمود البارودي.. شبه المواطن..أناهو ؟ اكلي جابو جعفر القاسمي هو و مرتو في الوطنية و قال نحب مرتي على خاطر تعرف اطيب كسكسي بالعلوش... دخل في الدور الثاني في حملة البجبوج بعد ما جابو الشعب على برة في مجلس النواب الجديد .. قلق مسكين من الكسكسي بالعلوش يحب يجرب الروز بالفاكهية... غاضو حمة الهمامي ياكل وحدو من ماكلة البجبوج ياسين ابراهيم .... ما تجيش في رتبة سياسي باش حتى نحكي عليك سبعة أيام و المزود خدام في شارع الحبيب بورقيبة... كافون متاع الزطلة ولد الحومة الشعبية و الذي عايش كالزبلة في البوبالة محيي سهرات بجبوجية في اطار الحملة الانتخابية الحفلة الواحدة ب عشرة ملاين الليلة. البلطي لحاس البولسية رقم واحد في تونس.... قالك الباجي رجل المرحلة بالامتياز و تمنيت لوكان جا اسمي في الكتاب الأسود كي ريت السيدة نعمة فيه... ايوه ؟؟ السيدة نعمة الذي شاخت هدايا و تكريم من بن علي و ليلى ولات قدوة و هي غير الليلة عيد الليلة عيد التوانسة ما يعرفولها شي الهادي دنيا ..رقاص أمينة فاخت..مصبح نهار الأحد يضرب في البندير للبجبوج في شارع الحبيب بورقيبة.. ريقو شاح مسكين... سيدي علي عزوز عاودها سبعة مرات بطلب شخصي من مرت خميس قسيلة القائمة تطول و تطول... فيها نور شيبة و نوفل الورتاني و مريم بالقاضي و صوفية صادق و مختار التليلي و الحمزاوي و شمس الدين باشا و كل ما هو من جماعة عنقني ذات الانتماء البجبوجي علاش مانيش كيفهم..؟؟ و ين المشكل امعلم كان جاريت التيار ؟؟ ندخل في النداء و نعمل بطاقة انخراط و ننشط معاهم في الحملة لانتخابية ..نضرب فلوس و اني شارب عقلي و ديما رابح.... نكمل قرايتي و يقولو هذا من أولاد الحزب .. نخدموه مع الدولة و جوي أحلى جو ا معلم ؟ علاش لا؟؟ لسبب بسيط جدا و هو أنو كيف نعمل هكا باش نخسر احترامي لنفسي و لذاتي..و نكون بعت كرامتي و ضميري لناس ما تستاهلش.. فالساكت عن الحق شيطان أخرس إنتصر العجوز وخسروا كرامتهم وخسروا احترامهم لأنفسهم أنا متأكد أن كل فرد منهم عندما سينظر إلى مرآته سيدرك حقيقته المرة وسيعرف كم هو ذليل و''عبد'' غير جدير بالإحترام....شكرا لكل نفس حرة في هذا البلد شكرا لكل من لم ينافق شكرا لكل من صوت لمشروع الحرية والكرامة الوطنية ..تونس ستنصر لا خوف بعد اليوم ..الباجي سيد العبيد لا يمثلني ...نحن احرار تونس لن نوافق لن ننافق ولن نغادر البلاد نحكيلكم حكاية...... يوم الأحد 21 ديسمبر...ساعات فقط بعد غلق مكاتب الاقتراع لأبوابها ..تم الفرز في مكنب الأقتراع تاذي أني كنت موجود فيه و قعدت نستنى في قوات الجيش لين يجيو يهزو صناديق الاقتراع ..خرجت باش نجيب قهوة... نشوف التلفزة نلقا ا كنسمة و التونسية عاملين بلاتوات و جو و كيسان تاي بالبندق قال شنية قالك هاو النتيجة عندنا و باش نهبطوهاكم .. الناس في المكاتب مازالت تحسب و نسمة و التونسية عندهم النتائج.. قلت يا سبحا ن الله... مش نرمال الشيئ هذاي .. ملا قوة يا بو قلب .. أكهو عاد قعدت و قلت أيا خلي نشوف شنية لحكاية ... اذا بيها ا كتونسية تعملك كونتور و عشرة ثواني ماشية و توخر و جو تقول ستار اكاديمي و يهبطلك يا سيدي يا مرحوم الوالدين البجبوج مرتبة اولى و السبسي رئيسا لتونس و و زيد يهزوني في نقل مباشر لكلمة سياد الرئيس الباجي قايد السبسي .. و مانحكيلكش يا خويا ؟؟ أكلبلاتو تقلب هرج و مرج .. محسن مرزوق قالك هذه حاجة ستنانيها و خدمنالها نحنا في نداء تونس ياسر ياسر و بدا يفلم و يجيب منا و يحط غادي ... مي كسوري تبسم مش مشلقة.. غلبها الضحك من الفرحة .. نعمل هكا و ندور نشوف نسمة نلقا أكمريم بالقاضي حمير و لابسا في الروج و بداةت من أول درج تحكي قتلك المنصف المرزوقي الرئيس السابق ؟؟ عينيها تنطق من الفرحة مسكينة قريب دورها فزاني مرتاح برعاية قروي اند قروي .. نرجعو امعلم... االحكاية من الأول كيفاه.. مشيت كمراقب عن المرشح الدكتور المنصف المرزوقي و اخترت أنو ما نقعدش في مكتب واحد نراقب بل أنو ننتقل من مركز اقتراع الى اخر .. أيا ا سيدي مشيت الصباح .. نلقا مكاتب الافتراع معبية ب أكاللحاسة أكالملاحضين قال شنية قال تابعين منضمات المجتع المدني .. جماعة عتيد و مراقبون تلحس لمراقبي البجبوج و اك شسمو هذاكا القطب المدني كيف الأطرش في الزافا .. فالحين كان في الطحين لمراقبي المرزوقي و نحنا رانا معاك و أفلام و حكايات .. ااا معلم انتي معاي؟ عادا دخلت معانا في الحملة الانتخابية للدكتور و جيت معانا مراقب عن محمد المنصف المرزوقي لواه الخوف و الطحين الفاخر عالصباح.. وسيب علينا بالله من حكاية الحيادية هاذي .. توا كي تلقاك ماشي في الشارع و يعرضوك زوز يتعاركو .. تتصور روحك كي تقعد تتفرج قال شنوة قال محايد باش تربح احترام الناس .. بالعكس بش يحتقروك العباد الكل .. و بالله خلي نكمل نحكي فرد مرة على هاذي عتيد و مراقبون و القطب المدني ..بكلها مفرخ أول حاجة ... ثاني حاجة تحسهم لا علاقة بحاجة اسمها سياسة .. و يجيو ايا صورني مع الصندوق صورلي صبعي ..صورني و اني نصيح في الورقة .. نتصور جايين على خاطر الكسكروت بالشاورما الذي يجيبوهولهم ... قلك مراقبون و مافهمتش فاش يراقبو .. تعباد موتا جاو بالذما باش يأديو واجبهم الانتخابي في أول انتخابات نزيهة و شفافة في تونس.. ريتوهم ؟؟ بالطبيعة لا قلي زادا ما عندوش الحق ؟؟ ا زحي ..مقيد و أمورو واضحة .. ﺍﻧﺎ ﻗﻴﺪﺕ ﻭ ﺍﻧﺖ ﻭﻗﺘﺎﺵ؟ ﻭﻗﻴﺖ ﺑﺎﺵ ﺗﻘﻴد. ﺍﻟﺸﻌﺎﺭ ﺍﻟﺬﻱ ﺣﺮﻙ ﻏﻴﺮﺓ ﺍﻻﻣﻮﺍﺕ ﻓﻘﺎﻣﻮﺍ ﻣﻦ ﻗﺒﻮﺭﻫﻢ ﻟﻤﻤﺎﺭﺳﺔ ﺍﻟﺪﻳﻤﻘﺮﺍﻃﻴﺔ ﺍﻟﻠﻲ ﺣﺮﻣﻮ ﻣﻨﻬﺎ ﻓﻲ ﺣﻴﺎﺗﻬﻢ كيما عم الهادي هذاي ميت من عام 1994 مقيد و انتخب في المدرسة الابتدائية فرحات حشاد بالمرسى .. سي علي زادا واحد من الأموات الذي مارس حقو الانتخابي زادا و باستفسارو قال أنو ماعجبتوش الفازة كيفاه التقييد في مكتب التسجيل في مقبرة الجلاز طلب عليهم شهادة الوفاة و زيد التصريح بالدفن.. وقال أنو كان من المفروض على السيد شفيق صرصار الاكتفاء بشهادة الوفاة فقط... وقد شوهد البارحة ابو القاسم الشابي والطاهر الحداد و الاخ ابن خلدون وهم يغادرون مكتب الاقتراع في أريانة بعد اداء الواجب الوطني تبا..موتى تنتخب في ميت.. و مسمي حملتو تحيا تونس!!! لا داعي للسؤال شكون قيدهم ، قيدتهم الماكينة متاع التجمع الخامج وهي طريقة من الطرق اللي توعد بيها احمد الصديق في لقاء مع قناة الميادين كان واضح وقال بكل وقاحة : يوم 21 ديسمبر سنبذل كل ما في وسعنا و بكل الطرق حتى لا يفوز المرزوقي . وهذه طريقة من الطرق اللي استعملوها الفساد الخونة ، و لقد لاحظنا نحن ان جميع انواع الخرقات استعملت و بتواطأ من الجميع بما فيهم طرطار متاع الهيئة الغير مستقلة متاع تدليس الانتخابات . واليوم يتشدقون علينا و يقولون الشعب انتخبنا !!!!؟؟؟؟؟ عن اي شعب يتكلمون ضحكنا على الجزائرية كيفاه انتخبو شطر ميت ياخي عاقبنا ربي بميت كامل و بالنسبة للذي يجي يحكي و يقلي هاو ثلاثين ألف مراقب في كافة أنحاء الجمهورية راقبو للمنصف المرزوقي نجب نقلو اني واحد فيهم الثلاثين ألف هاذوما... لكن كونك مراقب ما يعطيكش ياسر صلاحيات خاصة كي تلقاك وسط قاعد وسط اربعة أو خمسة بيوعة بجابيج عاملين رواحهم مستقلين كيما اكعتيد و شاهد و القطب المدني .. زيد عليهم سبعة أو خمسة مراقبين متاع النداء . زيد عليهم جماعة مكتب الاقتراع المحايدين ياسر ياسر .. جماعة الهيئة العليا الذي قالو مستقلة وهوما من الصباح للعشية يسبو في المرزوقي و اني نكتب في المحاضر... زيد نخرج قدام مركز الاقتراع نلقا زوز بجابيج يحكيو مع العباد و خاصة اكالنساء والرجالة الكبارة.. يقولولهم كان مايربحش البجبوج..الدولة باش تنحي كارني الدواء. و اخر حاجة تتلفت تلقا رضا شرف الدين يعمل في قهوة مقابل مركز الاقتراع الذي اني فيه!!!!!!. كيفاه باش نحارب الجميع.. و اني صلوحياتي مقتصرة في لفت نضر أعضاء مكتب الاقتراع الذي هوما بيدهم عملاء و متحزبين بطريقة غريبة... الكره في دمهم... يغزرولي من الصباح لين كملنا عبارنا قاتللهم واحد من العائلة أو متعاركين على ورثة!!!. كم أنت عظيم ياتونسي شربت حربوشة المهزلة الانتخابات النزيهة عادي ماك قبلت الغنوشي والمبزّع وقلّال ،ماك قبلت الباجي من غير ما تسيل اش كون حطّه ماك قبلت انقلاب الروز بالفاكية ماك سكتت على ملفّات الفساد والقضاء الفاسد... العربي نصرة و كمّولة متّهمين بالتٱمر على أمن الدولة يرتعوا مسيّبين... ،الموتة ينتخبوا عادي الاتحاد يحرق البلاد ماك فرحت بنهار خالص تتفرّج فيه على سي علاء ،القنّاصة إشاعة،المليارات و البترول ماسرقهم حدّ ،أيا توّا شمّر على ذراعك إخدم سيادك حتّى تموت ابعث بنتك للخليج تخدم على روحها وولدك جيبله الزطلة وإلّا أرميه للحوت،وقتاش يرجع بن علي ؟وقتاش النداء باش يحطّ اسمه على بنية التجمّع؟ ابكي على بلادك راك ماعادش عندك وجود تونس الى الوراء در، رجعنا للشعبة و القفة و العمدة و خموس و عشور و أقضيلي نقضيلك و نهب ثروات البلاد و ابعث الرافل خلي ينظف و تونس راهي واحة الأمن و الأمان الخ، طول حياتكم تعيشوا في البوبالة و شوية فيكم يا رعاع يا عبيد و من شبّ على التّلحيس شاب عليه. نعم ..انتهت حقبة المرزوقي على الأقل يحسب له أنه كان رجلا في زمن قلة فيه الرجال .. في زمن الانبطاح .. يحسب له أنه حلم ببلد ديمقراطي .. ببلد تتعدد فيه الحريات .. ببلد يتعايش في الجميع على اختلاف توجهاتهم الفكرية و على اختلاف انتمائتهم السياسية ... و يحسب له أنه أعاد الأمانة بالصندوق تماما كما أخذها و جنبنا سيناريوهات دموية كانت لتحصل لنا ولنا في مصر خير دليل .. و لو صبر أهل مصر و فلولها الحاكمون الان لعادت اليهم السلطة بلا قطرة دم.. تماما مثل ما حدث هنا .. بلوغتنا نحن .. خدمة نظيفة شعب طحان تعود الطحين يحبو كان العبودية ما يحبوش رئيس ولد شعب ولد حومة شعبية ليومنا هذا يدور في وسط الناس يكلم الناس عمل مداخلة بالفرنسية في مجلس الأمن الدولي دول العالم وقفت له تصفيقا حارا و تقديرا و فيهم اللي بكا (وزيرة خارجية المانيا و وزير الدفاع ) رئيس يقول مواقفو بكل جرأة وثقة رئيس ذو تاريخ نظالي عريق من الستينات نفي سجن حكم عليه ولقي الدعم من الزعيم نلسون مانديلا يحبو رئيس فاسد فاسق تاريخ أسود قتل اليوسفيين اغتال جدنا بن يوسف همش الجنوب إغتال قادة تونس الكبار عندو أكبر مصانع الخمر في تونس زور انتخابات في عهد بورقيبة وبن علي قمع قتل تهميش . . الدكتور الحقوقي السيد محمد المنصف المرزوقي قال كلمته الشهيرة في أفريل2010 أنو الأنظمة العربية بائدة ستسقط بثورات شعبية و هذا ماصار فعلا . . فعن أي مقارنة تتحدثون يا عبيد على قريب ستعود لتقدم محاضراتك في أكبر الجامعات الأمريكية والأوروبية لتفسر لهم معنى الديموقراطية ... عن قريب تعود لتمارس مهنة الطب والكتابه ..وعن قريب يعود الشعب العريان الحفيان الجيعان للمتراك والحبس وعمار 404 ...هذاك اش يصلح بيكم يكفيك فخرا يا دكتور انك رفعت راسنا امام العالم وصرت فخرا لكل احرار العرب وان باعك الجهال فالاحرار اشتروك وستبقى رمزا للحرية والكرامة والشرف والتواضع مهما حصل في هذه المهزلة التي سموها انتخابات ديمقراطية بالمال الفاسد والمرتشين فاعلم يا اشرف رئيس تونسي ان المحبة لا تشترى بالمال والكرامة لا تشتري بالخنوع ... لي الشرف انقدمت لك صوتي ..... وأحرار تونس في الداخل والخارج لهم الشرف انهم ﺻﻮتوا ﻟﻚ تهانينا لك ...أول رئيس عربي يترك الكرسي ويغادر القصر .. ليس إلى القبر ولا إلى السجن ولا إلى القتال ..ولا إلى حبل المنشقة هذا أعظم وسام حزت عليه ....تهانينا لك

بقلم أشرف قدوار ثالثة بيوتكنولوجيا المنستير